ನವದೆಹಲಿ:
ಭಾರತೀಯ ತಂತ್ರಜ್ಞಾನ ಮತ್ತು ಉತ್ಪಾದನಾ ವಲಯದಲ್ಲಿ ಶೀಘ್ರದಲ್ಲೇ ಭಾರಿ ಕ್ರಾಂತಿ ಸಂಭವಿಸಲಿದ್ದು, 2028ರ ವೇಳೆಗೆ ದೇಶದಲ್ಲೇ ಆಪಲ್‌ (Apple) ಮತ್ತು ಸ್ಯಾಮ್‌ಸಂಗ್‌ (Samsung) ನಂತಹ ಜಾಗತಿಕ ಮಟ್ಟದ ಸ್ವದೇಶಿ ಮೊಬೈಲ್ ಕಂಪನಿಗಳು ರೂಪುಗೊಳ್ಳಲಿವೆ ಎಂದು ಕೇಂದ್ರ ಐಟಿ ಸಚಿವ ಅಶ್ವಿನಿ ವೈಷ್ಣವ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಭಾರತದಲ್ಲೇ ಸಂಪೂರ್ಣವಾಗಿ ವಿನ್ಯಾಸಗೊಂಡು (Design), ತಯಾರಾಗುವ (Made in India) ಭಾರತೀಯ ಬ್ರಾಂಡ್‌ನ ಮೊಬೈಲ್ ಫೋನ್‌ಗಳು ಮುಂದಿನ ದಿನಗಳಲ್ಲಿ ಜಾಗತಿಕ ಮಾರುಕಟ್ಟೆಯನ್ನು ಆಳಲಿವೆ ಎಂದು ಅವರು ಭವಿಷ್ಯ ನುಡಿದಿದ್ದಾರೆ.
2028ರ ವೇಳೆಗೆ ಕೈಸೇರಲಿದೆ ಸ್ವದೇಶಿ ಮೊಬೈಲ್
ಸಚಿವರು ನೀಡಿದ ಮಾಹಿತಿಯಂತೆ, 2028ರ ಅಕ್ಟೋಬರ್‌ 23ರ ವೇಳೆಗೆ ಸಂಪೂರ್ಣ ಭಾರತೀಯ ವಿನ್ಯಾಸ ಹಾಗೂ ಬ್ರಾಂಡ್‌ನ ಮೊಬೈಲ್ ಫೋನ್‌ಗಳು ಸಾರ್ವಜನಿಕ ಬಳಕೆಗೆ ಲಭ್ಯವಾಗಲಿವೆ.
ಕಳೆದ ಕೆಲ ವರ್ಷಗಳಿಂದ ದೇಶದಲ್ಲಿ ಇಂತಹದೊಂದು ಬೃಹತ್ ತಾಂತ್ರಿಕ ಸಾಮರ್ಥ್ಯವನ್ನು ಬೆಳೆಸಿಕೊಳ್ಳಲಾಗಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಜಾಗತಿಕ ಮಟ್ಟದಲ್ಲಿ ಭಾರತೀಯ ವಿನ್ಯಾಸದ ಕಮಾಲ್:
ಅಮೆರಿಕಕ್ಕೆ ಭಾರತೀಯ ವಿನ್ಯಾಸದ 5G ಫೋನ್:
ಮೂರು ವರ್ಷಗಳ ಹಿಂದೆ ಭಾರತೀಯ ಎಂಜಿನಿಯರ್‌ಗಳಿಗೆ ಮೊಬೈಲ್‌ನ ಪ್ರಮುಖ ಭಾಗವಾದ ಮದರ್‌ಬೋರ್ಡ್‌ನ ಪಿಸಿಬಿ (PCB) ವಿನ್ಯಾಸಗೊಳಿಸುವ ಸವಾಲು ನೀಡಲಾಗಿತ್ತು.
ಇದರಲ್ಲಿ ಯಶಸ್ವಿಯಾದ ಭಾರತೀಯ ಕಂಪನಿಯೊಂದರ 5G-ಪ್ಲಸ್ (5G-plus) ಫೋನ್ ವಿನ್ಯಾಸವನ್ನು ಅಮೆರಿಕದ ಪ್ರಮುಖ ಟೆಲಿಕಾಂ ಸಂಸ್ಥೆಯೊಂದು ಆಯ್ಕೆ ಮಾಡಿಕೊಂಡು, ಈಗಾಗಲೇ ಅಮೆರಿಕನ್ ಮಾರುಕಟ್ಟೆಗೆ ಪೂರೈಸಿದೆ.
ಬೌದ್ಧಿಕ ಆಸ್ತಿ ಭಾರತದಲ್ಲೇ:
ಈ ತಾಂತ್ರಿಕ ಯಶಸ್ಸಿನ ಮೂಲಕ ಭಾರತೀಯ ಬ್ರಾಂಡ್‌, ವಿನ್ಯಾಸ ಮತ್ತು ಬೌದ್ಧಿಕ ಆಸ್ತಿಯನ್ನು (IP) ದೇಶದಲ್ಲೇ ಉಳಿಸಿಕೊಂಡು ಜಾಗತಿಕ ಮಟ್ಟದ 'ಬೆಸ್ಟ್ ಸೆಲ್ಲರ್' ಫೋನ್‌ಗಳನ್ನು ತಯಾರಿಸುವುದು ಸರ್ಕಾರದ ಪ್ರಮುಖ ಉದ್ದೇಶವಾಗಿದೆ.
ಕಾಂಗ್ರೆಸ್ ಆಡಳಿತದ ವಿರುದ್ಧ ವಾಗ್ದಾಳಿ:
ಹಿಂದಿನ ಕಾಂಗ್ರೆಸ್ ಸರ್ಕಾರದ ನೀತಿಗಳನ್ನು ತೀವ್ರವಾಗಿ ಟೀಕಿಸಿದ ಸಚಿವರು, "2004ರಿಂದ 2014ರ ಅವಧಿಯಲ್ಲಿ ಜಾರಿಯಲ್ಲಿದ್ದ ಬಿಗಿಯಾದ ನಿಯಂತ್ರಣ ಆಧಾರಿತ ಆಡಳಿತದಿಂದಾಗಿ ದೇಶದ ಉತ್ಪಾದನಾ ವಲಯದ ಬೆಳವಣಿಗೆಗೆ ಭಾರಿ ಹಿನ್ನಡೆಯಾಯಿತು. ಆದರೆ 2014ರ ನಂತರ ಪ್ರಧಾನಿ ನರೇಂದ್ರ ಮೋದಿ ಅವರ 'ಮೇಕ್ ಇನ್ ಇಂಡಿಯಾ' ಕಲ್ಪನೆಯು ಭಾರತೀಯ ಉತ್ಪಾದನಾ ಕ್ಷೇತ್ರಕ್ಕೆ ಹೊಸ ಜೀವ ನೀಡಿದೆ" ಎಂದು ಹೇಳಿದರು.